BORONG

Namomotan ko na klasmeyt,
Totoo….namomoot ako sa imo..diri ini bikol lang san dear classmate.
Pasensya na kay nagsurat ako saimo. Ambot baga kay kun hain nakatios na ako sin pira ka taon..niyan bunalik nan mas grabe pa ngani. Kaya imoda, naisurat ko na lang lugod. Mabawasan man lang an gub-at.
Aram ko diri mo aram, ni diri mo ngani namatian, sadto pa gustohon ko na talaga sabihon kaso lang aram mo na an talaw ko grabe. Inplaplano ko palang kun pan0 ko ikaw ranihan, an hurodughudog san dughan ko malin dalugdog na. Indadanggahan hasta mga kamot.
Diri ko maaraman kun diin makakuha sin kusog sin boot para man lang maipaabot sa imo ang paghanga. Inisip ko sa surat, mahudam ako notebook para kumopya sin notes nan pagbalik ko iipit ko na lang an surat. Pero maski sa surat ko, wara ako bilib. Malin kayas sin manok. Nakokornihan pa ako san baho san stationary.
Sasabayan ko na lang kunta ikaw sa pag-uli paghapon, ralakaw lang baga kita, kaso lang siwayan man an balay nato. Kun mag-alibi man ako, masyado obvious, grabe na kantiyaw diri lang hali sa mga kaklase ta, sa intero na anthonians na nagralakaw man.
Madalaw na lang ako sa gab-I, grabe man an tambay sa iyo. Diri man ako hadok sa kanira kay mga kila ko man, pero mao nga an problema kay kila ako. Kantyaw, raw-ay. Lalo na kun mabasted mo pa.
Kaya ngani, turutan-aw na lang sa harayo. Barasketbol na lang. Gurugitara nan intra sa choir. Parilimot-limot, hasta ngani nakisabay na lang ako sa aratolan pag inpareha ka sa iba.
Nagsiriway na kita sa college. Wara ni sayo na komonikasyon. Hay salamat nalibang sa iba na bagay. Nakalimot diyo…diyo lang talaga kay minsan minsan sa boarding house pagdiri hubog nakaisip. Nano daw kun nasabi ko sadto..ha?
An panahon talaga ha…nano baya kun nakay niyan, pagkalipas sin pira ka taon, nakatapos sin eskwela, may trabaho na mayad, kun hain nakaamot na sin kusog sin boot, nakaeksperiensa na may nini, nabasted, intero na..naimod ka ulit sa reunion.
Mapayt na talaga…may isog na…may porma na….may urag na….may asawa ka na.