IRISTORYAHAN

Iristoryahay na ako nabati man…


Sadto na panahon, sa sayo na lugar, na kun gahoyon Sta. Cruz…. an mga tawo intero may pas-an na krus…. Nan diri lang yun…nakakaistorya man nira an kanira diyos. Intero sira padaba san diyos…pero may sayo na tawo na pirmi in kakadto san diyos nan insasabihan na sa intero siya an pinakapadaba.

…. Ambot baga kay maski uruadlaw inbibisita siya san kanira diyos… uruadlaw man an reklamo sini…na mas magub-at an pas-an niya na krus kesa sa iba.

…. Sabi niya sa diyos na diri man niya inaayo na diri na siya magpas-an krus….kay pangit man kun maiiba siya….pero nakay man mas magub-at an krus niya.

…. dapat an tama lang an gub-at… an kaya lang…o mas mayad an mas magaan kay siya man baga an sabi na padabaonon….diri irog sini na nagralabod na an kaniya abaga…nan may bigol-bigol na an kaniya kili-kili…pati an tuhod niya may lupak na kay minsan na nadadapa siya…diri na nakatindog, mao na lang an inpanlalakaw niya.

…. Bag-o ngani siya magturog sa gab-i…sabi niya sa sadiri… mas mayad pa siguro diri na lang siya an pinakapadaba kay imuda an iba….nakangirit pa mag-alsa sa krus nira.

…. Kaya sa uruadlaw na imudan nira san diyos…mao ini an nahihilwasan niya. Nag-aawat ngay-an…nagdadagdag an reklamo. Intero sa gub-at… pagal….pagtios.

…. So, sayo kaadlaw…nauyam na siguro man an diyos kababati san agrangay niya…sinabihan siya na mabakal na lang sira bag-o na krus….nan para mas mayad umupod siya para makapili sin gusto. Pinahundan kay padaba.

… Diretso sira sa tindahan sin mga krus….paharani pa lang…sobra na an kaexcitedan…dunalagan na pasulod…sa pintuan pa lang..sinalya an dara-dara na krus nan nagbatog na magpili sin pantukal.

…. Nakaimod sin ginto na krus…mayad ini, ginto…pinurbaran…ay abadaw…grabe an gub-at. Diri kaya.

… Nakaimod sin lansang ….mayad ini, matibay…pinurbaran ulit… sus, mao man an gub-at nan halabaon…sagyad.

.… Nakaimod sin kahoy….mayad ini, magaan-gaan…1,2,3, payt…malin makulog sa abaga kay may buko-buko an kahoy.

…. Nakaimod sin stainless…. Mayad ini, wara titanus…praktis…pagol na, diri makapotan…mahanlason.

…. Intero diri mauyunan…nem…tyagaan mo na lang mun-a yun…basi sa sunod na bulan may umabot na bag-o… balik na lang kita dini.

…. Sige na lang ngani…ooppps…hulat lang… may sayo pa dini na krus o… nakay diri ini nakaupod sa mga display…inpapabakal man kaya ini…aber…purbaran ko mun-a.

…. Imuda… mayadon ini…tamang-tama an taas….pino…diri masyado mahanlas…nan ayos an gub-at..gahom ko ini. Mao na lang ini an bakalon ta.

… Basi diri yun inpapabakal…nakasiway baga.

…. Kakila mo man an tagsadiri sini na tindahan kaistoryaha na baya.

…. Sige….pero mao na talaga yun an gusto mo… pagnabakal ta yun…diri ka na sin reklamo.
…nakay mareklamo pa man ako…eksakto na ngani intero ini.

…nya hala….

…. Inpapabakal ba ini na krus…tagpira.

…. Ah…,diyos diri yun namo pwede ipabakal….

…. Sige na…maski tagpira ini..babayadan ko…kay gustohon ini san pinakapadaba ko…kun may tigsadiri na sini…sabihi bayadan ko na lang siya…maski doble.

….. Ah… Diyos diri namo yun pwede ipabakal kay diri man yun amo…may tigsadiri na sun…

…. Sabay imod sa kaupod san diyos.

…. Sa imo baga yun…diri mo na matandaan….kanina pagsulod mo sinalya mo lang….tinindog namo dun para diri makaulang…. Mao baga yun an dara-dara mo.