Istoryahay na ako nabati man…..
Sadto na panahon, sa sayo na bulod sa uma….Naghambug an sayo na kahoy sa kaupod niya….
….ako an pinakamaurag kay dako ako nan hataas. Matibay pa. Sigurado pag-inutod ako magiging lamesa ako na kakaunan san mga mayayaman nan kila sa sosyodad. Ikaw, hababaon ka na marugi pa. Siguro bagay lang sa imo an maging kaunan san mga hayop.
…lunipas an panahon…nagkatotoo an inhambog san kahoy…naging lamesa siya sa balay san gobernador. Pagnapapasyar an mga mayor nan mga mataas na opisyales, pirmi siya an ingagamit. An saday na kahoy hinimo san sayo na parauma na pakaunan san mga alaga niya na hayop.
Sadto man na panahon, sa sayo man gihapon na bulod sa iba naman na uma…may naghambog man na kahoy sa kaupod niya…
…..ako an pinakamaurag kay dako ako nan hataas. Matibay pa. Sigurado pag-inutod ako, hihimuon ako na barko. An pinakadako na barko na maski bagyohon diri maruruba kay grabe an sarig ko. Ikaw, saday ka lang. Kun himuon ka man na sakayan sa dagat, di-bugsay ka lang.
…lunipas an panahon…nagkatotoo an inhambog san kahoy…inutod siya na hinimo na dako-dako na barko. Sa kaniya insasakay an intero na paninda. Libot niya an mga pier san iba-iba na nasyon. Sa kada daong niya, napapanganga an mga tao na nakarani sa kaniya. An saday na kahoy naging sakayan san sayo na gurang na paraisda.
Sadto man ulit na panahon, sa iba na bulod nan iba na uma…may-on pa man gihapon sin mahambog…
…..ako an pinakamaurag kay dako ako nan hataas. Matibay pa. Sigurado ako an magiging pinakahataas na kahoy sa bilog na kinab-an. Maski diin maiimod ako, kay halos maabot ko na an panganoroon. Pagmay nahulog ako na dahon, paghugpa sa ingod, ogahon na. Pero diri ka magmondo kay dung-awon ta man ikaw. Diri lang ngani pirmi, kay makulog man baga sa likod.
….lunipas an panahon…nagkatotoo an hambog san kahoy….naging siya an pinakamataas sa intero. An saday na kahoy, pinulod na lang san tagsadiri san uma kay nakaulang sa pag-agi san mga turista na gusto makakadto sa bulod na may pinakahataas na kahoy. Piniliw lang kay wara man data.
Mao na ini an urhi na sadto na panahon….diri na sa bulod pero medyo uma….
….may sayo na bata na maluwas na sa kaniya ina. Nakay medyo piyesta sa lugar na nakadtoan nira nan diri pa man uso an ospital, wara mapwestohan an burod na ina. May sayo na tao na naluoy pinadagos niya an mag-irina sa kaniya kamalig. Maski puropan-o diri matutun-ogan. San nakaanak na, wara siya mabutangan san bata. San maimod san ama an bahugan, kinuha niya nan sinapinan balindang nan pinahigda muna an bata. Taod-taod may unarabot na mga hadi daw yadto. Naghatag pa sin mga mamahalon na gamit.
…..san dunako na an bata medyo tunali an utak. Nagbatog na magtukdo sa mga gusto man magbati sa kaniya. Nakay mayad an kaniya insasabi, dunaghan an estudyante niya. Pati ngani an mga tawo sa luyo na lugar, intutukduan man niya. Maski mabalyo sin dagat, nahudam na lang siya sin sakayan na saday sa kakila niya na gurang na paraisda. Matibay man an sakayan kay kaya man sumagupa sa daragko na balud. O malin an nagpatibay sa kaniya an kaniya sakay kay san sayo na mabaludun, tunindog lang an sakay, kunalma na an dagat.
….san sunikat na ini na tawo, syempre daghan na an nainggit nan nahadok. Nagdaranon sira para pakarauton siya. Istorya dini, istorya didto. May kulang. May sobra. An kinahuman, nasolsolan an kadaghanan. Nagdesisyon na patayon na lang para wara na kontra. An pagpatay sadto sa mga kalaban, inpapako sa krus. Dinakop nira ini nan pinapas-an san saday na kahoy na nakapiliw lang. Tapos san nakaabot na sa may bulod, pinako na nira sa kahoy na pas-an. San nakatindog na, tinangad san mga tawo na nakiusyuso kaupod naman an mga nagpako. Hasta niyan intatangad man gihapon an tawo na nakapako sa kahoy.
